Кұрманғазы Сағырбайұлы (1818 - 1889) – қазақ халқының классик күйші-сазгері, төкпе күйдің шебері. Ол қазіргі Батыс Қазақстан облысы Жаңақала ауданында Жиделі деген жерде дүниеге келген. Оның ұстазы – Ұзақ деген күйші.
Құрманғазы есімі көп ұлтты халықтар арасына кеңінен тараған. Ұлы күйші қазақтың аспапты музыкасын өркендетуге, оның дамуына шексіз үлес қосты. Сазгердің жүрек жарды туындылары көршілес халықтар арасында да танымал. Сондықтан оны «Күй атасы» деп атайды.
Құрманғазы Сағырбайұлы – халқының мұң-мұқтажын, арман-тілегін, қуанышын өз күйлерінде көрсете білген күрескер күйші. Оның күйлерін тыңдаған адам тебіренбей қоймайды. Белгілі «Адай», «Сарыарқа», «Серпер», «Кішкентай», «Кісен ашқан», «Түрмеден қашқан», «Аман бол, шешем, аман бол», т.б. туындылары – халқымыздың баға жетпес рухани байлығы.
Қайталанбас өнер иесі, ірі тұлға, күйші Құрманғазы – қазақ елінің мақтанышы.

Дереккөзі: «Сен  білесің бе?» энциклопедиясы / Құраст.: Қ.Ж. Райымбеков, Қ.Т. Байғабылов. – Алматы: Аруна, 2011. – 544-545 бет.