"Балқаш қаласының орталықтандырылған кітапхана жүйесі"
коммуналдық мемлекеттік мекемесі
25 Наурыз 2016
Наурыз мейрамына арналған қалалық «Әжелер – отбасының алтын қазығы» атты сайысы М.Хамзин атындағы мәдениет сарайында 2016 жылдың 21 наурыз күні өтті. Қалалық мәдениет және тілдерді дамыту бөлімі және Орталықтандырылған кітапхана жүйесі ұйымдастырған сайыстың мақсаты – жастардың бойында қазақ халқының әдет-ғұрпын, салт-дәстүрін жаңғырту, ұрпақ сабақтастығы аясында салт-дәстүрді көрсете отырып «Мәңгілік ел» идеясын насихаттау. Сайысқа зейнеткер аналар мен қаламыздағы мекемелердің атынан он ақ жаулықты әжелер қатысып, өз өнерлерін көрсетті.
Ұл-қыз өсіріп, немере сүйіп, өз отбастарының ұйытқысы болып отырған әжелер байқау шарты бойынша 4 кезеңнен өтті. Алдымен, «Сәлем-сөздің анасы» айдарымен әжелер барша қауымға өздерін таныстырды. «Ата дәстүрі-отбасы дәстүрінде» атты бөлімде әжелер ұлттық салт-дәстүрден көрініс көрсетіп, келесі
«Шығармашылық сайыс» бөлімінде ән орындау, би билеу, өлең оқудан өнерлерін ортаға салды. Соңғы бөлімде берілген тақырыптар бойынша мақал-мәтелдер айтудан сайысты.
Көтеріңкі көңіл-күйде өткен бұл сайыс осылайша өз мәресіне жетіп, қорытындысы шығарылды.
Байқауға қатысушы әжелердің барлығы жүлделі орынға лайықты деп саналып, түрлі номинациялар бойынша алғыс хаттармен және бағалы сыйлықтармен марапатталды.
