02 Желтоқсан 2014

Еліне ұран болған Ер Жәнібек

26 қараша күні А.Гайдар атындағы орталық қалалық балалар кітапханасында жаужүрек сардар, қабырғалы би, көреген қолбасшы батырлардың бірі – Ер Жәнібек Бердәулетұлының  300 жылдық мерейтойына арналған «Еліне  ұран болған Ер  Жәнібек»  атты тарихи сағат өтті. Шараның  мақсаты – елінің шекарасын кеудесімен қорғаған батыр  Ер Жәнібектің жеңімпаздық жолын жыр жолымен өрнектеу, сонымен қатар батыр бабамызбен бірге ел намысын қорғаған, қолбастаған көсем, сөз бастаған шешен Хан Абылай, Қаракерей Қабанбай, Қазыбек би секілді көптеген тарихи тұлғалардың  елді біріктіру жолында атқарған өлшеусіз еңбегін  жастарға үлгі ету; соңында қалған аңыздар мен шешендік сөздерімен таныстыру болды. Кітапханашы Шырын Бергенқызы батырдың өмірбаяны, тарихта атқарған ұлы істері туралы сөз қозғады. Шараға  қаламыздың Русаков атындағы мектеп –интернатының 7 сынып оқушылары қатысып, білімдерін ортаға салды. Қосымша слайд көрсетіліп, Жәнібек туралы журнал, кітаптарға шолу жасалды Оқушылар Ер Жәнібектің ақ туы, ақ сауыты, көк дөнені жайында, аңыздарын қызыға баяндап, білгендерін ортаға салып жатты.