21 Қыркүйек 2022
Әлемдегі ең сұлу және ең керемет атау - Ана. Оның қадірі мен қасиетін түсініп білу мүмкін емес. Қыркүйек айының үшінші жексенбісінде Аналар күні аталып өтті. Анаға құрмет жылдың қай мезгілі болмасын жалғаса бермек. Осыған орай С.Сейфуллин атындағы Орталық қалалық кітапханада «Ана - өмірдің ажары» атты кездесуге спикер ретінде Балқаш қаласының Құрметті азаматы, Аналар кеңесінің төрайымы, қалалық білім саласы ардагерлерінің төрағасы, ардагер-ұстаз Сыздыкова Шайзада Рыскуловна қатысып, өсиетті әңгімесімен бөлісті. Мемлекеттік қызметте болып, зейнеткерлікке шыққан ана өзінің тәжірибесімен, отбасылық өмір мен қоғамдық жұмыстарды қатар алып жүрудің қыр-сыры, ұрпақ тәрбиесі жайлы сырлы сұхбат берді. Аналар кеңесінің қоғамда әйелдер ісін көтеру мақсатында атқарылып жатқан жұмыстарына тоқталды. «Балқаш сазы» ардагерлер хорының әжелері ән-жырларымен шараның сәнін келтірді.